Tertia die infra Octavam Omnium Sanctorum.

Kýrie eléison.
Christe eléison.
Kýrie eléison.
Sancta María, ora pro eo.
Omnes sancti Angeli et Archángeli, oráte pro eo.
Sancte Abel, ora pro eo.
Omnis chorus Justórum, ora pro eo.
Sancte Abraham, ora pro eo.
Sancte Joánnes Baptísta, ora pro eo.
Sancte Joseph, ora pro eo.
Omnes sancti Patriárchæ et Prophétæ, oráte pro eo.
Sancte Petre, ora pro eo.
Sancte Paule, ora pro eo.
Sancte Andréa, ora pro eo.
Sancte Joánnes, ora pro eo.
Omnes sancti Apóstoli et Evangelístæ, oráte pro eo.
Omnes sancti Innocéntes, oráte pro eo.
Sancte Stéphane, ora pro eo.
Sancte Laurénti, ora pro eo.
Omnes sancti Mártyres, oráte pro eo.
Sancte Silvéster, ora pro eo.
Sancte Gregóri, ora pro eo.
Sancte Augustíne, ora pro eo.
Omnes sancti Pontífices et Confessóres, oráte pro eo.
Sancte Benedícte, ora pro eo.
Sancte Francísce, ora pro eo.
Sancte Camílle, ora pro eo.
Sancte Joánnes de Deo, ora pro eo.
Omnes sancti Mónachi et Eremítæ, oráte pro eo.
Sancta María Magdaléna, ora pro eo.
Sancta Lúcia, ora pro eo.
Omnes sanctæ Vírgines et Víduæ, oráte pro eo.
Omnes Sancti et Sanctæ Dei, intercédite pro eo.
Propítius esto, parce ei Dómine.
Propítius esto, líbera eum Dómine.
Propítius esto líbera eum Dómine.
Ab ira tua, líbera eum Dómine.
A perículo mortis, líbera eum Dómine.
A mala morte, líbera eum Dómine.
A pœnis inférni, líbera eum Dómine.
Ab omni malo, líbera eum Dómine.
A potestáte diáboli, líbera eum Dómine.
Per nativitátem tuam, líbera eum Dómine.
Per crucem et passiónem tuam, líbera eum Dómine.
Per mortem et sepultúram tuam, líbera eum Dómine.
Per gloriósam resurrectiónem tuam, líbera eum Dómine.
Per admirábilem ascensiónem tuam, líbera eum Dómine.
Per grátiam Spíritus sancti Parácliti, líbera eum Dómine.
In die judícii, líbera eum Dómine.
Peccatóres, te rogámus audi nos.
Ut ei parcas, te rogámus audi nos.
Kýrie eléison. Christe eléison. Kýrie eléison.
Deinde, cum in agone sui exitus anima anxiatur, dicuntur sequentes Orationes.
Proficíscere ánima christiána de hoc mundo, in nómine Dei Patris omnipoténtis, qui te creávit: in nómine Jesu Christi Fílii Dei vivi, qui pro te passus est: in nómine Spíritus sancti, qui in te effúsus est: in nómine Angelórum et Archangelórum: in nómine Thronórum et Dominatiónum: in nómine Principátuum et Potestátum: in nómine Chérubim et Séraphim: in nómine Patriarchárum et Prophetárum: in nómine sanctórum Apostolórum et Evangelistárum: in nómine sanctórum Mártyrum et Confessórum: in nómine sanctórum Monachórum et Eremitárum: in nómine sanctárum Vírginum, et ómnium Sanctórum et Sanctárum Dei: hódie sit in pace locus tuus, et habitátio tua in sancta Sion.
Per eúmdem Christum Dóminum nostrum.
℟. Amen.

Through the same Christ our Lord.
℟. Amen.

Deus miséricors, Deus clemens, Deus, qui secúndum multitúdinem miseratiónum tuárum peccáta pœniténtium deles, et præteritórum críminum culpas vénia remissiónis evácuas: réspice propítius super hunc fámulum tuum N., et remissiónem ómnium peccatórum suórum tota cordis confessióne poscéntem deprecátus exaúdi. Rénova in eo, piíssime Pater, quidquid terréna fragilitáte corrúptum, vel quidquid diabólica fraude violátum est: et unitáti córporis Ecclésiæ membrum redemptiónis annécte. Miserére Dómine gemítuum, miserére lacrimárum ejus: et non habéntem fidúciam, nisi in tua misericórdia, ad tuæ sacraméntum reconciliatiónis admítte.
Per Christum Dóminum nostrum.
℟. Amen.

Through Christ our Lord.
℟. Amen.

Comméndo te omnipoténti Deo, caríssime frater, et ei cujus es creatúra commítto: ut, cum humanitátis débitum morte interveniénte persólveris, ad auctórem tuum, qui te de limo terræ formáverat, revertáris. Egrediénti ítaque ánimæ tuæ de córpore spléndidus Angelórum cœtus occúrrat: judex Apostolórum tibi senátus advéniat: candidatórum tibi Mártyrum triumphátor exércitus óbviet: liliáta rutilántium te Confessórum turma circúmdet: jubilántium te Vírginum chorus excípiat: et beátæ quiétis in sinu Patriarchárum te compléxus astríngat: mitis atque festívus Christi Jesu tibi aspéctus appáreat, qui te inter assisténtes sibi júgiter interésse decérnat. Ignóres omne quod horret in ténebris, quod stridet in flammis, quod crúciat in torméntis. Cedat tibi tetérrimus sátanas cum satellítibus suis: in advéntu tuo te comitántibus Angelis contremíscat, atque in ætérnæ noctis chaos immáne diffúgiat. Exsúrgat Deus, et dissipéntur inimíci ejus: et fúgiant, qui odérunt eum, a fácie ejus. Sicut déficit fumus, defíciant: sicut fluit cera a fácie ignis, sic péreant peccatóres a fácie Dei: et justi epuléntur, et exsúltent in conspéctu Dei. Confundántur ígitur et erubéscant omnes tartáreæ legiónes, et minístri sátanæ iter tuum impedíre non aúdeant. Líberet te a cruciátu Christus, qui pro te crucifíxus est. Líberet te ab ætérna morte Christus, qui pro te mori dignátus est. Constítuat te Christus Fílius Dei vivi intra paradísi sui semper amœ́na viréntia, et inter oves suas te verus ille Pastor agnóscat. Ille ab ómnibus peccátis tuis te absólvat, atque ad déxteram suam in electórum suórum te sorte constítuat. Redemptórem tuum fácie ad fáciem vídeas, et præsens semper assístens, manifestíssimam beátis óculis aspícias veritátem. Constitútus ígitur inter ágmina Beatórum, contemplatiónis divínæ dulcédine potiáris in sǽcula sæculórum.
℟. Amen.
Súscipe Dómine servum tuum in locum sperándæ sibi salvatiónis a misericórdia tua.
℟. Amen.
Líbera Dómine ánimam servi tui ex ómnibus perículis inférni, et de láqueis pœnárum, et ex ómnibus tribulatiónibus.
℟. Amen.
Líbera Dómine ánimam servi tui, sicut liberásti Henoch et Elíam de commúni morte mundi.
℟. Amen.
Líbera Dómine ánimam servi tui, sicut liberásti Noë de dilúvio.
℟. Amen.
Líbera Dómine ánimam servi tui, sicut liberásti Abraham de Ur Chaldæórum.
℟. Amen.
Líbera Dómine ánimam servi tui, sicut liberásti Job de passiónibus suis.
℟. Amen.
Líbera Dómine ánimam servi tui, sicut liberásti Isaac de hóstia et de manu patris sui Abrahæ.
℟. Amen.
Líbera Dómine ánimam servi tui, sicut liberásti Lot de Sódomis, et de flamma ignis.
℟. Amen.
Líbera Dómine ánimam servi tui, sicut liberásti Móysen de manu Pharaónis regis Ægyptiórum.
℟. Amen.
Líbera Dómine ánimam servi tui, sicut liberásti Daniélem de lacu leónum.
℟. Amen.
Líbera Dómine ánimam servi tui, sicut liberásti tres púeros de camíno ignis ardéntis, et de manu regis iníqui.
℟. Amen.
Líbera Dómine ánimam servi tui, sicut liberásti Susánnam de falso crímine.
℟. Amen.
Líbera Dómine ánimam servi tui, sicut liberásti David de manu regis Saul, et de manu Golíæ.
℟. Amen.
Líbera Dómine ánimam servi tui, sicut liberásti Petrum et Paulum de carcéribus.
℟. Amen.
Et sicut beatíssimam Theclam Vírginem et Mártyrem tuam de tribus atrocíssimis torméntis liberásti, sic liberáre dignéris ánimam hujus servi tui, et tecum fácias in bonis congaudére cœléstibus.
℟. Amen.
Commendámus tibi Dómine, ánimam fámuli tui N., precamúrque te Dómine Jesu Christe Salvátor mundi: ut propter quam ad terram misericórditer descendísti, Patriarchárum tuórum sínibus insinuáre non rénuas. Agnósce Dómine creatúram tuam, non a diis aliénis creátam, sed a te solo Deo vivo et vero: quia non est álius Deus præter te, et non est secúndum ópera tua. Lætífica Dómine ánimam ejus in conspéctu tuo, et ne memíneris iniquitátum ejus antiquárum, et ebrietátum, quas suscitávit furor sive fervor mali desidérii. Licet enim peccáverit, tamen Patrem, et Fílium, et Spíritum sanctum non negávit, sed crédidit, et zelum Dei in se hábuit, et Deum, qui fecit ómnia, fidéliter adorávit.
Delícta juventútis, et ignorántias ejus, quǽsumus, ne memíneris Dómine; sed secúndum magnam misericórdiam tuam memor esto illíus in glória claritátis tuæ. Aperiántur ei cœli, collæténtur illi Angeli. In regnum tuum Dómine servum tuum súscipe. Suscípiat eum sanctus Míchaël Archángelus Dei, qui milítiæ cœléstis méruit principátum. Véniant illi óbviam sancti Angeli Dei, et perdúcant eum in civitátem cœléstem Jerúsalem. Suscípiat eum beátus Petrus Apóstolus, cui a Deo claves regni cœléstis tráditæ sunt. Adjuvet eum sanctus Paulus Apóstolus, qui dignus fuit esse vas electiónis. Intercédat pro eo sanctus Joánnes, eléctus Dei Apóstolus, cui reveláta sunt secréta cœléstia. Orent pro eo omnes sancti Apóstoli, quibus a Dómino data est potéstas ligándi atque solvéndi. Intercédant pro eo omnes Sancti et Elécti Dei, qui pro Christi nómine torménta in hoc sǽculo sustinuérunt: ut vínculis carnis exútus, perveníre mereátur ad glóriam regni cœléstis, præstánte Dómino nostro Jesu Christi: Qui cum Patre et Spíritu sancto vivit et regnat in sǽcula sæculórum.
℟. Amen.

Kýrie eléison. Christe eléison. Kýrie eléison.

Orémus.
Tibi Dómine commendámus ánimam fámuli tui N., ut defúnctus sǽculo tibi vivat: et quæ per fragilitátem humánæ conversatiónis peccáta commísit, tu vénia misericordíssimæ pietátis abstérge.
Per Christum Dóminum nostrum.
℟. Amen.

Through Christ our Lord.
℟. Amen.